dddddddd

ໃນຕອນບ່າຍຂອງວັນສຸກ ວັນທີ 11 ຕຸລາ 2019, ໄດ້ມີພິທີເປີດໂຕການບໍລິການຮັບຊໍາລະເງິນດ້ວຍ WeChat Pay ແລະ AliPay ຢ່າງເປັນທາງການ ຢູ່ທີ່ ໂຮງແຮມລາວພຣາຊາ ນະຄອນຫຼວງວຽງຈັນ ໃຫ້ກຽດເປີດພິທີໃນຄັ້ງນີ້ໂດຍ ທ່ານ ພູຂົງ ຈັນທະຈັກ ຜູ້ອຳນວຍການໃຫຍ່ BCEL ແລະ ທ່ານ Jacky Chiang ຜູ້ອຳນວຍການດ້ານການພັດທະນາຍຸດທະສາດ, Swift Pass. ເປັນກຽດເຂົ້າຮ່ວມໂດຍ ທ່ານ ພຸດທະໄຊ ສີວິໄລ ຮອງຜູ້ວ່າການທະນາຄານແຫ່ງ ສປປ ລາວ,  ທ່ານ ຄໍາສຸກ ສູນດາລາ ຮອງປະທານສະພາບໍລິຫານ ທຄຕລ ແລະ ທ່ານ ປອ ພູເພັດ ກ້ຽວພິລາວົງ ກໍາມະການສະພາບໍລິຫານ ທຄຕລ ແລະ ທ່ານ ສຸລິສັກ ທຳນຸວົງ ວ່າການຫົວໜ້າກົມຄຸ້ມຄອງລະບົບຊໍາລະສະສາງ ທະນາຄານແຫ່ງ ສປປ ລາວ ແລະ ທ່ານ Chew Ann Wee ຫົວຫນ້າຝ່າຍຂາຍ ແລະ ການຕະຫລາດ NTT Data ພ້ອມດ້ວຍບັນດາຄະນະກົມ, ຄະນະພະແນກທີ່ກ່ຽວຂ້ອງຈາກທະນາຄານແຫ່ງ ສປປ ລາວ, ບັນດາລູກຄ້າຂອງ ທຄຕລ, ບໍລິສັດໃນເຄືອ ທຄຕລ, ຄະນະອໍານວຍການ, ຄະນະພະແນກ, ສູນ ແລະ ສາຂາ ຕະຫຼອດຮອດພະນັກງານຂອງ ທຄຕລ ພາຍໃນນະຄອນຫຼວງວຽງຈັນ ພ້ອມດ້ວຍສື່ມວນຊົນຈາກຫຼາຍພາກສ່ວນກໍ່ໄດ້ເຂົ້າຮ່ວມຢ່າງພ້ອມພຽງ.

ໃນຍຸກແຫ່ງການພັດທະນາທີ່ເຕັກໂນໂລຢີມີຄວາມກ້າວໜ້າສູງທີ່ທະນາຄານຍຸກໃໝ່ຂັບເຄື່ອນດ້ວຍເທັກໂນໂລຢີດີຈີຕໍ້ ແລະ ທຄຕລ ຍັງຄົງມຸ້ງໝັ້ນໃນການເປັນຜູ້ນຳທາງດ້ານເທັກໂນໂລຢີການເງິນເພື່ອຕອບສະໜອງຄວາມຕ້ອງການຂອງລູກຄ້າຫຼາຍທີ່ສຸດ. ເຊີ່ງ ທຄຕລ ໄດ້ມີການພັດທະນາຢ່າງຕໍ່ເນື່ອງ ແລະ ເຕີບໃຫຍ່ຂະຫຍາຍຕົວໃນຫຼາຍໆຜະລິດຕະພັນ ໂດຍສະເພາະແມ່ນການບໍລິການຊຳລະສະສາງຄ່າສິນຄ້າຜ່ານ QR Code ກັບສາກົນ. ເຊີ່ງໃນຄັ້ງນີ້, ທຄຕລ ໄດ້ກ້າວໄປອີກຂັ້ນທາງດ້ານການຮັບຊຳລະສະສາງດ້ວຍ QR Code ໂດຍການຮ່ວມມືລະຫວ່າງ BCEL ກັບ Swift Pass ແລະ NTT DATA ເພື່ອຊ່ວຍເປີດຊ່ອງທາງການຊຳລະສະສາງໃຫ້ຫຼາຍຂື້ນ. ເຊີ່ງຈະເຮັດໃຫ້ສະມາຊິກຮ້ານຄ້າຂອງ ທຄຕລ ສາມາດຮັບຊຳລະສະສາງດ້ວຍ WeChat Pay ແລະ AliPay ນັ້ນໝາຍຄວາມວ່າ: ລູກຄ້ານັກທ່ອງທ່ຽວຈີນ ແລະ ຜູ້ໃຊ້ແອັບ WeChat Pay ແລະ AliPay ສາມາດຊໍາລະສິນຄ້າ ແລະ ບໍລິການທີ່ປະເທດລາວໄດ້ຢ່າງສະດວກປອດໄພ ແລະ ຍັງເປັນການເພີ່ມຍອດຂາຍໃຫ້ແກ່ຮ້ານຄ້າໃນລາວອີກດ້ວຍ.

ຖືເປັນຄັ້ງທຳອິດໃນລາວທີ່ຮ້ານຄ້າສາມາດຮັບການຊຳລະດ້ວຍ WeChat Pay ເຊີ່ງເປັນການຮັບຊຳລະດ້ວຍ QR Code ທີ່ລວມເອົາທັງ WeChat Pay ແລະ AliPay ໄວ້ໃນ QR Code ດຽວກັນ ແລະ ຍັງເປັນຄັ້ງທຳອິດໃນລາວທີ່ຮ້ານຄ້າ E-Commerce ຈະມີ QR Code ໄວ້ຮອງຮັບການຊຳລະສະສາງດ້ວຍ Wecha pay ແລະ AliPay ອີກດ້ວຍ.

ດ້ວຍຕົວເລກຜູ້ຊົມໃຊ້ WeChat Pay ແລະ AliPay ຕ່າງກໍ່ມີຜູ້ຊົມໃຊ້ຫຼາຍກວ່າ 900 ລ້ານຢູເຊີ້ ສະແດງໃຫ້ເຫັນວ່າເປັນແອັບລະບົບການຊຳລະສະສາງຍອດນິຍົມໃນຈີນ ແລະ ເປັນແອັບທີ່ຄົນຈີນໃຊ້ສ່ວນຫຼາຍໃນຊີວິດປະຈຳວັນ. ນັກທ່ອງທ່ຽວພ້ອມດ້ວຍນັກທຸລະກິດຈີນທີ່ເດີ່ນທາງມາໃນປະເທດລາວມີຄວາມເພີ່ງພໍ່ໃຈ ຕ້ອງການທີ່ຈະໃຊ້ແອັບ WeChat Pay ແລະ AliPay ເຊັ່ນດຽວກັນ. ການທີ່ ທຄຕລ ເປີດໃຫ້ບໍລິການຊຳລະສະສາງດ້ວຍ WeChat Pay ແລະ AliPay ນີ້ຈະຊ່ວຍໃຫ້ຮ້ານຄ້າທີ່ເປັນສະມາຊິກຂອງ BCEL ເປີດໂອກາດຂະຫຍາຍຄວາມອາດສາມາດໃນການຮັບຊຳລະສະສາງທີ່ສອດຄ່ອງກັບຄວາມຕ້ອງການຂອງຄົນຈີນໄດ້ເປັນຢ່າງດີ. ເຊີ່ງເປັນຜົນປະໂຫຍດຕໍ່ຫົວໜ່ວຍທຸລະກິດໃຫ້ດີຍີ່ງຂື້ນເນື່ອງຈາກຈະສະດວກສະບາຍເຮັດໃຫ້ລູກຄ້າຄົນຈີນຮູ້ສືກເໝືອນໃຊ້ຈ່າຍພາຍໃນປະເທດຂອງຕົນຊ່ວຍກະຕຸ້ນການໃຊ້ຈ່າຍຂອງຄົນຈີນໃນລາວ ເຊີ່ງເປັນກຸ່ມນັກທ່ອງທ່ຽວຫຼັກໆອີກປະເທດໜື່ງ.

ຕໍ່ກັບໂອກາດດັ່ງກ່າວ BCEL ມີຖານຮ້ານຄ້າສະມາຊິກຮັບຊຳລະສະສາງດ້ວຍ QR Code Function OnePay ແອັບ BCEL Oneຈຳນວນຫລາຍກວ່າ 10.000 ຮ້ານຄ້າ ທີ່ພ້ອມຈະຮອງຮັບການບໍລິການຮັບຊຳລະສະສາງດ້ວຍ WeChat Pay ແລະ AliPay ແລະ ຍັງສືບຕໍ່ຂະຫຍາຍຮ່ວມມືກັບຄູ່ຮ່ວມທຸລະກິດ ແລະ ຮ້ານຄ້າສະມາຊິກເພື່ອຂະຫຍາຍຕາໜ່າງການຮອງ WeChat Pay ແລະ AliPay ໃຫ້ກວ້າງໃນຂົງເຂດທົ່ວປະເທດ.

ໃນຍຸກແຫ່ງການພັດທະນາທີ່ເທັກໂນໂລຢີມີຄວາມກ້າວໜ້າສູງ ແລະ ເພື່ອການຫັນເປັນດີຈິຕໍ້ຂອງອຸດສະຫະກໍາການຊໍາລະສະສາງຂອງລາວ ທຄຕລ ຈະສືບຕໍ່ພັດທະນາຜະລິດຕະພັນ ແລະ ການບໍລິການຢ່າງບໍ່ຢຸດຢັ້ງ ໂດຍທຸກຜະລິດຕະພັນ ແລະ ການບໍລິການ ທຄຕລ ແມ່ນເນັ້ນຄວາມທັນສະໄໝ, ສະດວກສະບາຍ, ມີຄວາມປອດໄພ ກວດສອບໄດ້ ແລະ ໄດ້ມາດຕະຖານສາກົນ ເພື່ອນໍາສະເໜີບໍລິການທາງການເງິນທີ່ຫຼາກຫຼາຍທັນສະໄໝ ຕອບສະໜອງຄວາມຕ້ອງການລູກຄ້າ ບົນພື້ນຖານຄວາມຮັບຜິດຊອບສູງຕໍ່ສັງຄົມ, ເພື່ອໃຫ້ລູກຄ້າ ແລະ ສັງຄົມໄດ້ຮັບປະໂຫຍດສູງສຸດ.

ທະນາຄານການຄ້າຕ່າງປະເທດລາວ ມະຫາຊົນ

ທັນສະໄໝ ວ່ອງໄວ ໝັ້ນໃຈ

Call center: 1555, Facebook: BCEL Bank, Website: www.bcel.com.la